奄尖鬼尋褸記

話說我想搵一件quality decent 嘅有帽毛毛褸已經搵左好鬼耐, 我上年已經搵緊, 搵搵下online 買左件Franche Lippee羽絨頂住先, 不過唔擋風, 大風嘅時候有啲凍... /omg

所以今年秋天嘅時候我已經又再重提我要買件新褸嘅事. 我每次行街都睇, Holt Renfrew, Aritzia, Nike, Sport Chek... 都睇過不過就係搵唔到件鍾意嘅!

大熱嘅 Moncler 我又唔鍾意, 我覺得佢個質地好似垃圾袋... /sweat
好多人買嘅Canada Goose 又好鬼誇張, 我而家又唔係去北極... /XD

我想搵一件 casual 得嚟個style又幼細啲嘅, 唔會太師奶不過又思文啲嘅... 我都知道我形容得好抽像, 無人明我講乜係正常嘅 /XD
今日我又決定要去搵褸喇!

Shopping之前就梗係要先醫肚先啦, 唔係大隻佬肚餓會發脾氣! /dignose
我哋去左高柏, 叫左我嘅至愛之一, 廈門炒米
大隻佬就食白汁焗魚柳飯

快快手食啲野, 跟住第一站就去左Oakridge Center 先~


因為我有啲想give up, 求其喺Aritzia 買一件就算, 我已經無乜心機再睇喇...

不過佢呢個location又無我想要嘅長身款, 要去Richmond先有喎... 所以我哋又去左Richmond Center, 呢個location有長身款, 不過無我想要嘅黑色, 一係就買短身款, 有黑色不過得一件, 仲要甩毛甩線添!!! /floor

大隻佬就話同我返Metrotown睇多次, 因為sales 話Metrotown 可能會有...  所以我哋又返去Metrotown, 順手睇埋其他舖頭, 是但買件著住先啦...

點知呢個location 都係無, special order 要一月先有!
唉... 咁算啦, 橫掂我都唔係真係咁鍾意嗰件褸 /nobigdeal


我有去埋其他舖頭睇下會唔會有啱我嘅款, 不過都係無件鍾意!
就當我心灰意冷諗住算數唔買嘅時候, 我行左入去BCBG. 我已經好耐無去過, 因為佢呢幾年啲衫唔啱我 style...

點知竟然比我見到件毛毛褸, 我都係抱住試下無壞嘅心態, 因為嗰款望落去唔係話特別靚, 同埋都唔係我鍾意嘅 design, 點知一試之下著左上身又幾好睇喎!!! 見佢仲有另外一個款, 我又無洩底試埋啦, 出呼意料之外都好睇喎!!!

質料唔錯, 價錢okay, 大隻佬見我咁開心就喺咁叫我買啦~ 喺我煩惱緊買唔買晒兩件嘅時候, 個sales同我講Boxing Day Sale嗰日只要買多一樣野就會有50% off!!! 如果我留低credit card info比佢, 佢肯幫我 rain check! 不過就要Boxing Day先可以攞返屋企~
大隻佬一聽到即刻話兩件要晒佢! 咁就比一件錢有兩件喇!!! 
咁我梗係舉腳贊成同大隻佬講Thank You啦 /XD

YEAH!!! 我終於買到褸喇!!!

呢件係羽絨, 啲質地又防風, 夠晒暖~

嗰毛邊好厚身, 著起上嚟啲毛好鬆好輕, 大隻佬話好似舊雲喎 /XD

呢件係另一件, 灰色

有毛邊, 內層仲可以除出嚟, 外層薄薄哋可以做風褸~

多謝大隻佬出錢又出力, 呢份就係我今年既Christmas & Birthday gift喇~

行左咁耐超攰, 我哋返屋企歇一歇先出去食野, 今晚夜左所以去尖's小廚食打冷

仲有條煎倉魚, 不過太心急食左無影相... /floor

我今日由本來心灰意冷, 到突然搵到心頭好, 仲要打孖嚟, 真係太好喇!!!
不過我相信最開心嘅係大隻佬, 因為佢唔洗再被迫陪我睇褸喇 /wahaha