豬的一天

因為琴晚大隻佬啲朋友成4:00am走, 我同大隻佬又瞓到1:00pm先起身 /sweat 
我哋起身食左啲野, 就攤左喺梳化, 跟住大隻佬無啦啦開左套幾年前嘅韓劇, "Dream High" 出嚟睇. 

我之前叫極佢都唔睇, 點知佢無啦啦又自己開嚟睇. 可能因為佢而家知道"Dream High"有佢最鍾意嘅IU掛 /nobigdeal
我每次見到呢套劇, 我都會諗返起我之前車禍受傷要留喺屋企嘅日子真係非常非常非常咁悶又頹廢. 好彩嘅喺有大隻佬陪住我咋 /please
話時話, 大隻佬好少可會睇劇集, 以前我一睇韓劇, 佢就話我睇埋晒啲婆媽劇, 佢成日都話啲韓劇男主角好似好得閒, 咁多時間溝女... 經過我多年嘅感化, 佢而加間唔中都會陪我睇 Running Man 㗎!!

大隻佬喺到睇, 我就喺梳化睡著左, 一瞓又瞓到5:30pm. 坐左一陣, 我就去預備今晚嘅打邊爐喇, 大隻佬就更係繼續睇佢嘅"Dream High"啦...

今晚嘅二人世界打邊爐, 今次比平時買少左啲雞肉同豬頸脊, 費是要打多日啦~

打完邊爐, 食埋我哋喺 Steveston 買嘅Tiramisu同European Cheesecake 做甜品就冲涼瞓教喇.
今日除左瞓同食之外, 乜都無做過, 唔喺豬喺乜野?!  /XD

星期六, 無節目

通常我同大隻佬星期六都會去下街, 但係今個weekend會好大雨, 所以我地都係決定係屋企唞下算喇。 我哋瞓醒個時已經係1:00pm, 起身食左啲野, 我地就開場喇. 

我哋睇左 "World War Z" , 唔算非常好睇, 不過都 okay嘅, 最epic都係Israel wall 嗰幾幕, 不過近排睇左好多zombie戲, 我成日幻想如果呢個世界真係有zombie咁我哋要點呢?!  我一定會著晒成套 ice hockey嘅gear, 咁佢哋一定咬我唔到, 跟住我仲可以打爆佢哋個頭添 /XD

跟住我仲自己睇多左套戲, 叫做"被偷走的那五年", 其實有啲情節唔係好make sense, 不過我都睇到好傷心, 我諗我唔會選擇做手術, 我情願開開心心過多幾年就算. 
大隻佬又笑我睇戲睇到喊, 成日話我感情豐富. 次次我一睇呢啲戲, 大隻佬都會行開, 廢是打擾我嘅雅興.

夜晚就整sushi, 今次簡單啲, 淨喺買左啲簡單嘅材料, 自己自由發揮啦! 

我哋初初一切住嗰時曾經整過一次, 不過我哋技術有限, 都喺覺得出去食仲好, 所以我哋都好耐無整過喇 /blush
食飽飯, 大隻佬有幾個朋友左嚟玩, 我就喺den睇下電視劇, 佢地玩到4:00am先走, 啲男人唔洗擔心通頂會皮膚唔好, 一講玩就零舍好精力.

Happy Friday!

太好喇, 星期五終於到喇! 次次一到星期期五, 心情特別輕鬆, 因為可以休息一下, 唔洗咁早起身. 今年好似早左凍, 9月頭都仲好熱, 呢一兩個星期就特然好大風大雨,仲有啲凍添, 公司好多人都開始病, 我都開始有少少鼻水, 有時我情願病幾日勁嘅之後好返, 好過而家咁鼻水長流... /blur

今日放公去左Fujiya買左啲材料諗住星期六係屋期整sushi, 買左啲salmon, ikura, scallop, tobiko 同 啲整futomaki嘅材料諗住整個簡單版sushi night. 跟住就去左 Pricesmart 買縵魚, 零食同星期曰晚打邊爐嘅材料, 我同大隻佬諗住星期六日都唔出街, 喺屋企唞下, 睇下戲.
今次睇戲好想食熱浪 /hmm

買完嘢返屋企放低啲嘢我地就去左North Road 食韓國野, 凍凍地最好就食啲有熱湯嘅野.

 食完野返到屋企冲完涼就已經暈左, 我想追返五集"巨輪"呀....... /no

名不虛存

大隻佬叫得我做munchkin就梗有理由.

我本人十分為食, 乜都order, 乜新野都想試, 不過試完唔好食就要大隻佬汁手尾 /dignose
我想食就會即刻去買, 如果搵唔到, 我都要搵啲野代替... 
我最怕就係睇飲食節目, 次次睇完我都會同大隻佬講, "I need to get my fix!" 所以我係唔會夜晚睇飲食節目, 我唔想食宵夜呀, 我會變豬㗎... /sweat

好似我今日個lunch, 我琴晩無拿拿想食Ikura, 我即刻去左 Fujiya 買材料, 跟住就整左呢個 lunch box! 大隻佬成曰比我吹脹... /nobigdeal

<又食又拎US一天遊> Marysville - Blaine -> Tulalip Casino -> Premium Outlet

大隻佬因為自己跌爆左自己個電話個mon, 需然仲用得, 不過佢個心就成曰嫌棄個電話, 成
日密謀想買個新電話. 新電話我用, 佢用我個舊㗎喎...
今次比佢等到Xperia Z Ultra出, 仲跌左啲價, 佢就拿拿臨order左個電話ship去US, 跟住我地就weekend去pick up. 
星期六, 9/21, 7:15am 起身, 8:45am 出發, 11:30pm 過border 去到Blaine, pick up 我個新電話! 
大mon電話確係正!! 臨瞓前煲下劇都仲得~ 防水機有到好, 我地啲女士成曰化妝茶handcream, 個mon會用到一達達, 而家用水沖下就乾淨晒 /hmm

跟住即刻出發去Tulalip Casino 食 lunch buffet, 去到都成2:30pm, 都好多人下,不過好彩條隊好快, 排左15mins 到就有位.
因為太餓既關係, 成朝淨係食左包snack size Cheezies, 我掛住食無影到相 /blush
野食就普通啦, 不過 $12 既buffet, 去邊到搵, 食 food court 都要 $10一位啦

食飽飽就去shopping喇, 去左隔嚟既 Premium Outlet, 點知個到有個car show, 好多collector cars, 部部都keep得好好, 不過我地遲左, 啲車開始走, 我地行左一個圈就入左outlet shopping.

我買左啲衫, 大隻佬一樣都無買, 佢話等black friday先買, 男人係大減價既面前係冷靜啲既! /sweat

由4:30pm 行到7:30pm 先走, 中途例必去入滿油先, 美國啲油平啲. 大隻佬入油我就實走入油站睇下有無啲Vancouver無得買既snacks (為食就為食啦!! /XD)
我買左兩包Mint M&M, 我好鐘意食 chocolate, M&M 都照殺!

我地9:30pm 過border, 過border 個時我好鬼驚佢會check我地,好彩無check到, 唔係無啦啦要比多幾百蚊tax都幾肉赤.....返到Vancouver, 去食完打冷就返屋企喇.
好彩今日好好天, 所以渣車都唔太辛苦, 辛苦晒大隻佬, 我就又食又拎 /wahaha

後記: 大隻佬成曰霸住我個電話, 放工一見到我就話, "借你個電話嚟玩下..." 我成日話比佢用, 我用返部 Xperia Z, 佢又話太大部唔方便... 不過都好, 我係唔會比返部新電話你㗎!!! /bye 

中秋節2013

今早12:00am, Watsapp左阿姨同佢講中秋節快樂, 我其實好想同佢講話好掛住佢, 佢就好似媽媽一樣咁錫我. 好想放假返香港見下屋企人.

今曰係我同大隻佬一齊過既第六個中秋, 幾年前我專登由香港hand carry偷運九龍酒店奶皇月餅返黎(其實重有五香肉丁, 味珍香豬肉乾,加頓朱古力bun.... XD) 一額汗以為自己比人捉到,好彩係虛驚一場 ^^, 重有兔仔同楊桃燈籠. 而家每年中秋我哋都攞返呢兩個燈籠出嚟玩.

我地無出去賞月, 只好揸車返屋企個時望下個月亮當賞咗月啦~

今年有恆香三月黃蓮蓉月同醉樓香貓山皇榴蓮月餅,  重有人送左個美心雙黃比我, 正!!! 我好鬼鐘意食甜野, 大隻佬都好鐘意食, 成曰同我爭食月餅 /floor
我幾乎要買多盒三黃月餅自己一個慢慢enjoy...

公司中秋節晚飯

雖然公司已經賣左比外國公司好多年, 但因為仲保留住中秋節食飯既傳統, 所以琴晚17號提早左兩曰去左Dark Table. Pitch black dinner 好正,漆黑一片, 不過感覺反而 close 左.
我負責諗左啲遊戲, 有一個係要每組畫一個人頭, 每人畫一樣,要有齊眼,耳,口,鼻,墨,眼眉毛... 組組都畫到鬼畫符咁... 我地個組最似人樣, 攞第一有$5 Starbucks card 添!! 
大家都玩得好開心, 到第二日返到公司同事們都仲講緊, 哈哈, 今次大成功!! Yeah!
我地組既杰作~

Pre-中秋節晚餐

雖然自己一個係加拿大咁多年, 不個自從同大隻佬一切住之後, 多左"家"既感覺.

我哋身為中國人, 做節梗係要食雞~

今次食海南雞!

My First Post

睇左Blog都有大慨5年, 曾經有setup過一個Blog, 不過只係寫左一篇就無寫, 次次都做隱形人, 今次襯Yahoo Blog close, 大家都轉黎Blogger, 我又襯下熱閙寫下Blog啦.
大家多多指教! /hihi