我的收"鑊"

今日我同大隻佬起身立即去沖涼換衫! 原來佢琴晚又係諗住休息一陣先去沖涼, 點知佢同我一樣太攰, 喺書房瞓左, 瞓到今朝先起身... /omg
我哋兩個無啦啦罰自己瞓左一晚梳化同書房椅... /sweat

搞左一輪, 終於出發去 W41st Ave. ~
今朝大隻佬無啦啦話比我聽佢打左電話去 Call The Kettle Black 留左Staub隻鑊比我 /blush

我話左要買隻鑊好耐, 不過成日都無實際行動, 因為我仲係心大心細買唔買過隻鑊好. 我屋企隻鑊又無問題, 都仲用得, 同埋我好擔心Staub隻鑊會太重, 所以我一直無行動, 咁大隻佬之前又話同我去 Seattle 睇下先, 所以我好surprise佢會無啦啦話今日就去買!!!

喺我迫供之下佢話係諗住買anniversary禮物比我, 咁佢又知我想買隻鑊, 所以諗住試下打電話去舖頭問一問, 點知仲要做緊sale, 又有我想要嘅紅色, 所以就嗱嗱臨留定同我去買!

YEAH~ 我終於買左隻鑊喇 /blush
我仲買多左兩個 baking dish 添!!!

同我個爐幾襯 /blush

我好似連續兩個禮拜都買廚具... 我要停一停, 要汁一汁個廚房先有位再買 /XD

買完我哋去隔離食件餅醫下肚先 ~

今晚想早啲食飯, 不過而家又太早, 咁就近近哋搵個地方行一陣啦, 所以又去左 Oakridge Center.

我去 Crate and Barrel行個圈, 大隻佬就去左試玩 Xbox One.

我喺Crate and Barrel買左啲cupcake紙杯, 我想今年試下 Christmas baking /hmm

之後我去搵返大隻佬, 一齊行左個圈. 到臨走經過 Windows 嗰booth, 佢見無人又玩多次...

有無咁好玩, 企係商場中間都要玩... /sweat 

仲要好得戚咁話比我知話個staff話佢好勁添 /dignose

梗係話你勁啦, 佢想你買吖嘛! 唔通話你玩得鬼咁渣咩 /XD

緊住我哋去食晚飯, 我如願以嘗去左萬巒豬腳~

食完去左 Superstore. 我哋想買啲聖誕燈掛喺廳嗰窗到, 裝飾下, 有氣氛啲嘛 ~

仲比我見到呢個 mini warmer, 啱晒我用嚟暖手

返到屋企安置好我啲戰利品之後, 想食啲暖笠笠嘅糖水, 所以我快快手煮左個薑湯紫糯米黑芝麻湯圓 

食完睇下電視, 就沖涼瞓覺, 放假嘅時間梗係過得特別快, 咁又一日~