為食鬼係煮婦系列 - 第三回

今日係 Remembrance Day, 公眾假期, 所以又多左一日時間比我喺屋企搞搞震~

我同大隻佬假期嘅首要任務就係瞓覺! 所以我哋一定會瞓到夠先起身. 雖然個生理時鐘習慣左每日要早起, weekend九點零十點就會醒一醒, 不過我哋都會盡瞓, 瞓到再瞓唔著先捨得起身, 不過例牌一定係我起身先. 
不過因為琴晚我哋都幾晏先瞓, 所以我都瞓到一點幾先起身 /shock

第一樣任務 - 煮早餐.
我同大隻佬嘅早餐例牌有 sausage, scramble eggs, hash brown 同水果, 時日水果係 red kiwi, 再配牛奶oatmeal.

 
我哋一路食一路睇左套戲, The Internship.  有 Vince Vaughn 同 Owen Wilson, 一貫嘅鬼佬comedy風格, 不過不失,  都okay 嘅~

食完早餐已經晏晝四點幾, 我清潔完廚房又開工試整新野, Nutella Stuffed Chocolate Chip Cookies~ 

我近排愛上左 baking, 我決定每個weekend都試整一樣. 今次呢個cookie睇相就好正喇, 仲有我同大隻佬都鍾意嘅nutella, 製成品應該都唔錯嘅~

呢隻cookie比平時多步驟, 因為要brown啲牛油, 個dough又要雪一個鐘先再包 Nutella, 跟住先焗得, 所以都搞左一輪... /sweat

整完一輪, 雪左個cookie dough就已經夠鐘預備晚飯. 琴晚大隻佬已經要求話今晚要食焗葡國雞飯,  所以今晚我就整個焗葡國雞飯再加個炒菜芯啦。

我仲係摸索緊隻新鑊嘅火力, 我又用左老抽去醃雞扒, 一個唔留神, 啲雞扒就變左黑面神... /floor
好彩淋左啲葡汁喺面唔多覺 /wahaha

我都煮得唔錯, 啲飯仲好有心機咁炒底添 ~ 要比個叻自己 /blush

加埋琴晚煲好嘅木瓜雪耳雞腳豬骨湯, 可以潤一潤

我襯大隻佬未食完, 我焗埋個雪好左嘅 cookie dough...

啱啱焗好嗰時我嗱嗱臨食左塊, 啲Nutella溶溶地, 暖暖地, 好evil呀~ 
鍾意Nutella嘅人一定鍾意呢個cookie, 成塊cookie入面全部都係 Nutella, 正 /please

食飽飯仲有琴晚瞓左覺無食到嘅蛋糕~ 

嘩! 飽到上心口呀!!!