又到食火雞既時候 - Thanksgiving

今日我一早就起左身, 今日天氣好好. 心情都特別好. 望出窗外, 仲見到有啲樹開始轉紅色. 下一個weekend一定要去睇紅葉先得!

我起左身就開工做家務, 預備今晚餐飯. 我決定煮定個洋蔥湯先. 由於大隻佬好鍾意飲洋蔥湯嘅原故, 所以好多時我一煮西餐, 佢都會要求我煮呢個湯, 今次都唔例外.  French Onions Soup 其實好容易煮, 最難係點brown嗰啲洋蔥, 要好好心機, 比耐性慢慢煮到啲洋蔥啡色先再落 broth, 咁個湯先香同甜 

我煮好個湯, 就叫醒大隻佬. 喺我勞役佢之前, 我要喂飽佢先! /hmm
我哋琴日喺Oakridge Center 買左盒 cupcake, 就一於食cupcake做早餐啦~ 好耐無食過 cupcake, 呢間都幾好味.

食飽飽, 我就繼續做我嘅家務, 1:00pm 隻火雞就放入焗爐開始焗.

大隻佬就開始作反, 攤係梳化打機. 我實在太天真, 以為佢會聽聽話話幫我手做野, 不過算啦, 我做仲快, 仲企理, 佢次次做完我都要汁手尾. 到晏晝四點幾, 喺我嘅獅哮功震壓之下, 大隻佬終於出去幫我去個 Dry Cleaner 到攞返張被返嚟, 同幫我去 Save On Foods 買 Beef Bouillon.

有時真係唔知啲男人搞乜鬼, 叫佢買一樣野, 離開屋企之前比埋要買嗰樣野個樣佢睇, 都可以打電話返嚟問幾百個問題, 仲要除左你叫佢買嗰樣野之外, 買好多其他野返嚟! 買咁多Hungry Man返嚟, 人地肯定覺得佢屋企個女人唔煮飯佢食, 仲塞爆我個freezer!!! 男人真可愛... /blur

我喺大隻佬嘅電話轟炸之下, 終於完成我既準備功夫, 可以去沖個靚涼, relax吓... 但係喺呢個時候就出事喇!!! 唔知係咪我唔小心 hi 到嗰制, 個焗爐熄左!!! 到我沖完涼, 搞完一輪其他野先發現... /shock

結果, 由原本plan好左嘅七點食飯, 變左九點半!!! /floor 

唉......... 我真係勁烏龍, 好彩嚟食飯嘅係我個 best buddy, 無乜所為咋, 唔喺真喺勁唔好意思~

Sorry 呀 Mr M. 要你睇左成套 Gremlin 先有飯開... /sweat

終於搞掂食得嘞, 開餐! 

我地一路食, 一路傾計 catch up 吓, 一路睇 Iron Man 3,  好開心好warm.

Mr M. 陪我行過好多難行嘅路, 開心唔開心都一樣咁陪我走過. 好難得可以有好似家人一樣嘅朋友. 

我地食飽仲有dessert , 我special request 嘅 Diplomat Bakery Hazelnut Cake!!! 

咁又過左一個 Thanksgiving, 我嘅感恩係我有能力自給自足喺加拿大生活, 行我自己想行嘅路, 沿途仲有大隻佬, Mr M. 等等咁疼錫我嘅人... 我會好好珍惜 /please